Irakasleentzako lantegiak

Urriaren 29an Basurtoko Udaltegian bildu ziren Liburu Gaztea booktrailer lehiaketan izena eman duten Bizkaiko hainbat ikastetxeetako irakasleak. Goiz batez, lau orduko ikastaro teoriko-praktikoa jaso zuten.

Urtero, booktrailer lehiaketari lotuta antolatzen da halako lantegi bat irakasleentzat. Ikasleekin liburuak irakurri, landu eta trailerrak prestatzeko gidoiak idazten hasi aurretik, lagungarria izan ohi da trailerren inguruan hitz egitea, zinemaren oinarriak ezagutzea, grabaketa aholkuak jasotzea edota bideo edizioan trebatzea. Halaxe diote behintzat lehiaketaren edizio ezberdinetan lantegi hauetara gerturatu izan diren irakasleek. 

Zinemaren eta trailerren munduan murgiltzeaz gain, helburu ezberdinak izan zituen lantegiak. Alde batetik, editorial ezberdinen zenbait booktrailer ikusi eta aztertu zituzten, baita aurreko edizioetako ikasleenak ere. Horietatik abiatuta, bidelagun lana egiteko aholku eta trikimailu ezberdinak jaso zituzten bertaratutakoek. 

Aurtengoan, arazo tekniko batzuk direla-eta, ezin izan dugu ikastaroa Gipuzkoan ere eskaini. Hala ere, irakasleen zalantza oro argitzeko prest izango gara Galtzagorri elkartetik. 

Orain, ikasitakoa ikasleei helarazi eta praktikara eramatea besterik ez zaie geratzen. Desiatzen gaude aurtengo parte hartzaileen lanak jasotzen hasteko! Martxoan ikusiko ditugu emaitzak!