Iraia Okina Durangon jaioa da 1980. urtean. Arte Ederretan lizentziatu zen eta ilustrazioaren inguruan hainbat ikastaro egin ditu. Gaur egun irudigile bezala lan egiten du. Bere irudiak aldizkari, kartel eta zenbait liburutan ikus daitezke, baita erakusketa ezberdinetan ere.

2008 urtean Joxantonio Ormazabalek idatzitako “Zirkua amets” ipuinarekin II. Etxepare beka eskuratu zuen, haurrentzako album ilustratua osatuz, 2010ean Euskadi Sarietan ilustrazioen sailean finalista izan zena. 2009an Euskadi sarietan finalista izan zen Peru Magdalenak idatzitako “Ilania” ipuinarekin. 2011an, lan bera Bratislavako irudigileen erakusketan parte hartzeko aukeratua izan zen. 2010an, Japoneko ilustratzaileen elkarteak egindako lehiaketa internazionalean, “Fine Work” aipamena eman zioten. 2012an Joxantonio Ormazabalek idatzitako “Ilargia esnatu da” da bere azken lana. 2013an urrezko plaka eman zioten Bratislavako ilustrazioen erakusketa internazionalean. 2017an “Emakume Burugabea” proiektuarekin Eusko Jaurlaritzako ilustrazioak sortzeko diru laguntza jaso du.

Irudiekin ez ezik, Iraia Okina bere sormen eta esperimentazio lanak burutzeko, bestelako lan eta proiektuak ere etengabe garatzen ari da, beti ere bere sentimenduak adierazteko ikus hizkuntza egokiaren bila: margoak direla, artisau-lanak, txotxongiloak... Izan ere, Iraiak bizitza estilo bat bihurtu du bere lana.

Web orrialdea: www.iraiaokina.com/

* Segurtasun arrazoiak direla medio, profesional honen datu pertsonalik ez duzu aurkituko web gune honetan. Hala ere, horiek eskuratu nahiko bazenitu Galtzagorrira dei dezakezu (Telf: 943471487) edota email bat igorri (galtzagorri@galtzagorri.eus) eta ahal dugun guztian lagunduko dizugu.