Izenburua: Gabon, zilbortxoa!
Idazlea: Lucie Brunellière
Ilustratzailea: Lucie Brunellière
Itzultzailea: Aztiri itzulpen zerbitzuak
Argitaletxea: Ttarttalo
Urtea: 2023
Orri kopurua: 14
Adina: 0tik gora
Laburpena:
Tamaina txikiko kartoné liburu hau jolaseko liburu-objektutzat hartu daiteke. Tonu alai batean, haurra lokartu aurretik, etxe askotan errepikatu daitekeen jolasa irudikatzen da.
Istorioa liburuaren azalean hasten da. Haurra irakurleari begira dago, jolasteko gogoz. Babes-orrian haurra tapakirik gabe agertzen da, lotarako untxitxoa eskuetan duela. Jolasari ekinez, orrialdez-orrialde, estaliko dugun gorputz atalari “gabon!” esan eta ondorengo orrialdeko tapakiak gorputz atal hori estaltzen du. Orrialdeen tamaina txikitik handira doa, irakurketan aurrera egin ahala orrialdeak handitzen dira, liburuaren tamaina izan arte. Atzeko babes orrira iristerakoan umea tapatuta gelditzen da eta irakurleari galdera luzatzen dio egileak, irakurleari gabonak emanez eta argia itzaltzeko keinua eginez. Behin liburua ixtean, atzeko orrian umetxoa lotan agertzen da.
Liburuan 4 ilustrazio topatuko ditugu, hauetatik hiruk, lotara doan haurtxoa dute erdigunean. Lehenengoa, azalean, esna guri begira, jolasteko gogoz. Bigarren irudia, jolas guztian zehar hor mantenduko da, tamaina ezberdinetako orrialdeekin jolasten baitu, irudian lotarako prest dagoen haurtxoa tapatzeko. Eta hirugarrena, kontrazalekoa, haurtxoa lo dagoena. Atzeko babes-orrian logelako lanpara topatuko dugu.
Haurtxoaren eszena marrazteko forma borobilduak erabili ditu. Errotulagailuz beteriko kolore masak, trazu beltzez mugatuta daude.
Irudiak ezinbestekoak dira jolasa aurrera eramateko. Fondoan bi kolore bereizten dira: batetik, azaleko fondo arrosa, argitasuna islatzen duena; eta bestetik, kontakizun osoan zehar orrialdeak betetzen dituen kolore berdea, logela ilunxeagoa azalduz. Kontrazalean, berde ilunak adieraziko digu argia itzali dugula.