Izenburua: Dinosauroei buruzko egia
Idazlea: Guido Van Genechten
Ilustratzailea: Guido Van Genechten
Itzultzailea: Edu Zelaieta Anta
Argitaletxea: Ibaizabal
Urtea: 2018
Orri kopurua: 32
Adina: 4tik gora
Laburpena:
Ipuina eta dibulgazioaren artean kokatzen den album honek, tonu umoretsu eta dibertigarrian dinosauroei buruzko oinarrizko informazioa eskaintzen du.
Oilo bat dugu protagonista, dinosauroen album honetan kolatu den oiloa hain zuzen, eta elkarrizketa bitartez bera ere dinosauroen familiakoa dela justifikatuko du, familia argazki album bat tarteko.
Oilo arruntak (“gallus gallus domesticus”) dinosauro ezberdinen argazkiak erakutsiko dizkigu eta berarekin duten harreman eta berdintasunak kontatzen joango zaigu: antzeko hankak, hegoak, arrautzak errutea.. eta horrela, errealitate eta fantasia konbinatuaz, velociraptorra, iguanodona, diplodocusa, tyrannosaurusa, stegosaurusa eta triceratopsak ezagutuko ditugu.
Albumak bi zati nagusi ditu irudiei dagokionez, hasiera eta bukaeran oiloa da protagonista nagusia eta orrialde osoko irudi handi bitartez aurkezten zaigu, fondo zurian hasieran eta ilunean bukaeran.
Bigarren zatian aldiz, liburuaren erdialde osoa hartzen duena, dinosauroak aurkezten dira argazki album baten bitartez. Irudiak tamaina ezberdinekoak dira, koloretsuak, argazki oinak dituzte eta hainbat datu ere ematen dira (pisua adibidez). Orrialde bikoitzak hartzen dituzte argazkiek, oiloa tamaina txikian agertzen da eta esaten duena orrialdearen beheko aldean irakurtzen dugu.