Uztailaren 1ean zabaldu zuten Ungersheim-en (Frantzia), Mulhousetik 20 bat kilometrora Printze Txikiaren jolas-parkea: Le parc du Petit Prince. Antoine de Saint-Exupéry idazle frantsesaren obra ezagunean oinarritutako parkea da eta 23 hektareako eremu zabalean eskaintzen dituen atrakzio guztiek espazioa, abiazioa, ura, animaliak eta landareak dituzte ardatz. Parkea, gainera, duela 500 urte (1492an) Ensisheim meteoritoa erori zen lekuan bertan eraiki dute. Parkearen diseinuak meteorito haren inpaktua eta B612 planetaren eta bere sateliteen itxura iradokitzen du.

Parkeko atrakzioen artean dira, besteak beste, Printxe Txikiaren abenturak (protagonistaren filma 3 dimentsiotan); astronomiari buruzko galderei erantzuteko jolas-gunea; edota Printze Txikiaren beste planetetara bidaiatzeko aukera ematen duen gunea.

Antoine de Sant-Exupéry-ren Printze Txikia da munduko beste hizkuntzetara (275) gehien itzuli den liburu ez erlijiosoa. 1943an argitaratu zen. Protagonista haur bat denez, Haur eta Gazte Literaturan sailkatu izan da liburua, baina jorratzen dituen gaiengatik (bizitzaren zentzua, adiskidetasuna eta maitasuna) helduen literaturan ere badu lekurik.