Liburuen Altxorra Gipuzkoan eta Liburu Ibiltariak Bizkaian bideari ekingo diote irailaren 26an Arroan eta urriaren 1ean Mallabian, hurrenez hurren. Galtzagorri elkarteak Gipuzkoako eta Bizkaiko Aldundien babesarekin egitasmook abiarazten dituen 20. ekitaldia da Gipuzkoan eta 19.a Bizkaian. Aurten inoiz baino ikastetxe gehiagok parte hartuko dute, 59 guztira, eta 4.058 ikaslek gozatu ahalko dute liburuz betetako kutxekin. Aholkularitza eskaerak ere gora egin du, 412 irakasleek jasoko dute aurtengo ekitaldian eta, haien bitartez, 4.940 ikaslek. Egitasmoa, kutxak eta aholkularitza zerbitzua barne hartuta, 8.998 ikasleengana iritsiko da.
Liburuen Altxorra eta Liburu Ibiltariak egitasmoen ardatzak liburuz betetako kutxak dira eta kutxak ibiltariak dira inondik ere. Hala, eskolaz eskola bidaiatzen dira kutxak eta ikastetxe bakoitzean hilabete inguru egiten dute. Kutxak ireki eta Galtzagorriko adituek ondo asko aukeratutako liburuen gaineko dinamizazio saioak egiten dituzte. Garai batean eskola txikiak izandakoetan, baina denboraren poderioz hazi diren ikastetxeetan egitasmo beraren barruan txertatutako aholkularitza zerbitzua eskaintzen diete irakasleei.
Aurtengo ikasturtean Gipuzkoako 34 eskolatara eramango dute Liburu Altxorra, iaz baino bat gehiago, eta aholkularitza zerbitzua 12 ikastetxetan eskainiko dute, hain zuzen. Gipuzkoan, azken urteotan bezala, Imanol Mercero Galtzagorriko kideak eta adituak eskainiko ditu saioak. Oraingoan, honezkero kutxak ere zahartuz joan direnez, berritutako beste kutxa bat bidaiatuko da eskoletara. Hortaz, Gipuzkoako bost kutxetatik lau izango dira berriak aurten. Aholkularitza zerbitzuko saioak ere urrian jarriko dira martxan Gipuzkoan.
Bizkaian 25 ikastetxeetara iritsiko dira liburu kutxak eta aholkularitza zerbitzua iaz baino bost eskola gehiagotan egingo dute, guztira, hamaika. Kutxa bidaiaren lema Saroa Bikandi dinamizatzaileak hartuko du Bizkaian. Aholkularitza zerbitzuak lehenengo geldialdia Lemoan egingo du abenduaren 18an.
Kutxak eta kartela
Liburuak daude egitasmo honetarako prestatutako hamar kutxatan, 127 liburu kutxa bakoitzeko. Horietatik guztietatik 53 nobedadeak dira, hau da, iaz argitaratutakoak eta Galtzagorriko irakurketa mintegian aukeratutakoak. Besteak klasikoak eta aurreko urteek utzitako alerik onenak dira. Helburua ikasleek liburuak esku artean hartu eta irakur ditzatela da, eta irakurtzean ongi pasa dezatela. Galtzagorriko adituek ez dute kutxen erabilpena zein den zehazten, eskola bakoitzak askatasuna dauka erabilpena zein izango den lantzeko. Dinamizatzaileek kutxak eraman, erakutsi, aurkeztu eta irakurketak egiten dituzte ikasleekin, baita animazio ekintzak ere. Kutxak eskoletan dauden hilabetean tokian tokiko eskola liburutegien edo gelen parte bihurtzen dira, ikasleek eskura izan ditzaten.
Aurtengo kartela, alfabetoa oinarri duena, Leire Urbeltzek egin du. Hizki bakoitzari munduko kultura ezberdinetako izenak gehitu dizkio, denak generorik gabeak. Araitz, Ñambi (sendabelarra guaranieraz), Zeru, Joar, Leze, Qiang (indartsu txinatarrez), Rumi (Harri quechueraz), Itoitz, Falak (Zerua hindueraz) eta beste hainbat hizki beste izen marraztu ditu Urbeltzek Liburuen Altxorra eta Liburu Ibiltariak egitasmoaren aurtengo irudi izango den kartelean.
Egitasmo honen hastapenetik, ikasturtero, afixa edo kartela ilustratzen dute irudigile ezberdinek. Hala egin izan dute, besteak beste, Iraia Okinak, Elena Odriozolak, Belen Lucasek, Antton Olariagak, Mattinek, Jokin Mitxelenak, Aitziber Alonsok, Jon Zabaletak edota Estibalitz Jalonek. Kartel hori alfabeto bihurtu zuen Galtzagorri elkarteak 2017-2018. Ikasturtean. Lehendabiziko alfabeto hori Iban Barrenetxeak egin zuen.
