Hitza eta hotsa, haur-poesiarekin gatoz!

Pupuan trapua. Idazlea: Xabier Olaso. Marrazkiak: Agurtzane Villate. Pamiela, 2004. 

84 poesia dira, bi ataletan banatuta: Esna Irauteko poemak eta Lotarako kanta-kontuak. Xabier Olasok 2005eko Euskadi Literatura Saria jaso zuen haur- eta gazte-literaturaren atalean. Tradiziotik eta herri literaturatik edaten duen liburua da. Hitz-jokoak, haikuak, trufak, umorea eta haurrei zuzenean barrea eragiten dieten kontutxoak ere erabiltzen ditu Olasok liburua osatzen duten poemetan. Haurrei ahots goran irakurtzeko edota haurrek ahots goran irakur ditzaten aproposak dira liburua eskuetan lotarako prestatzeko, jolasean aritzeko edota barre egiteko. 

Liburuari izenburua ematen dion poema uzten dizuegu, gogoa piztu eta apaletatik atera edota haren bila liburutegira zein liburu-denda txikira joan zaitezten.  

PUPUAN TRAPUA

Urratu zait belauna,

odol ttanta bat txirrist,

negarraren negarrez

muki-kandelak zintzilik.

Bat, bi hiru

lau eta bost

bost xentimoko pupua

sei, zazpi, zortzi

bederatzi eta hamar

hamar xentimoko trapuaz

sendatu zait niri.

Harro nago nire pupuaz

eta harroagoa nire trapuaz.