Galtzagorri Elkarteak eta Durangoko Berbaro Elkarteak elkarlanean, bi saio antolatu dituzte aurtengo Durangoko Euskal Liburu eta Disko Azokaren baitan egingo den Haur Literatura Aretorako: ipuin kontaketa saio bat eta ilustrazio tailerrak.

Aurtengo kultura gonbidatua galegoa denez, Galtzagorri Elkarteak Galiziako Galix (Asociación Galega do Libro Infantil e Xuvenil) elkartearekin batera ipuin kontaketa saio berezia antolatu du abenduaren 6rako; idazle euskaldun eta galegoen kontaketa partekatua izango da. Arratsaldeko 17:00etan hasiko da Haur Literatura Aretoan, Elkartegia eraikinean.

Horrez gain, abenduaren 8an, areto berean, Miren Gonzalez artistaren ilustrazio tailerra antolatu du Galtzagorrik. Bi saiotan egingo da: 15:00etan eta 17:30an. Parte hartzeko aurrez eman beharko da izena.

Bestalde, azken urteotan bezala, Galtzagorri Elkarteak sortutako hainbat argitalpen izango dira aurten ere azokan: Bularretik Mintzora eta Sasi Guztien Gainetik CD-liburuak; eta Klis-Klasikoak liburu-sortako lehen liburuak, Pinotxoren Abenturak, Maria Goikoa Batbirulau, Indianoa eta Txan Fantasma.