Lorerik Gorriena album ilustratuarekin irabazi dute Sandra Garayoa Coterak eta Itziar Otegi Aranburuk Etxepare Sariaren aurtengo ekitaldia. Biek Galtzagorri Elkarteak, Iruñeako Udalarekin eta Etxepare Sariarekin berarekin urtero antolatzen duen BIKO-TEKA tailerraren aurtengo ekitaldian parte hartu zuten, album ilustratuen sariketa hauetako azken urteetako irabazle guztiek bezala. Irabazleek gaur jaso dute saria, eta inoizko ediziorik emankorrena izan dela esan dute antolatzaileek 35 lan aurkeztu direlako. 

Lorerik Gorriena albumak gutako bakoitzaren bizitzan Gertakari Handiek duten zama nabarmentzen du, norberaren beldurrek, edo besteengandik jasotzen ditugunak, zenbateraino kateatzen gaituzten galdetuz. Ipuin tradizionalen
ildotik, Txano Gorritxoren alaba dugu ardatz eta protagonista, eta berak erabaki beharko du etxean geratu edo oihanean barneratu, historia errepikatu edo berritu, eta, jakina, oihanean basapiztia ezaguna dauka zain, lerde jario…

Epaimahaia Leire Salaberriak (ilustratzailea), Idoia Sobrinok (liburuzaina) eta Patxi Zubizarretak (idazlea) osatu dute. Lorerik Gorriena album ilustratuaren honako ezaugarriak azpimarratu dituzte:

-Ipuin tradizionalen onena jaso, eta gaur eguneraino dakar haien leinua. Chestertonen esanetan, herensugea edo basapiztia gutako bakoitzarengan dago eta literaturak haren kontra borrokatzeko zalduna eskaintzen digu. Hau izan
daiteke bitartekari batek umeari ipuina kontatzerakoan erakusten ahal dion gauzarik garrantzitsuena. Edo agian bitartekariak berak (dela guraso, irakasle, izeba edo aitatxi), jasoko duen irakaspenik handiena.

-Testua sotil eta argi idatzia dago, zentzu guztietan neurritsu, eta bikain uztartuta dago ilustrazio gorribeltzekin: protagonistak eta haien neurriak, naturaren presentzia delikatua, dena sinbolismo eta sujerentzia handiz adierazia.

-Indar handiko irudiak sortu ditu gama kromatiko oso neurtu batekin. Gorriak eta beltzek pisu izugarria dute kontakizunean eta ipuin tradizionalarekin lotzeaz gain irakurlearen emozioak ukitzeko gai da lehen begirada batekin. Testura eta trazuekin jolastu du, deskripzioetatik urrunduz, eta sinbolismo eta sujerentziaz betetako mundu propio bat
azalduz.

Irabazleek 5.000 euroko saria jasoko dute egile-eskubideen aurrerapen bezala eta Pamiela argitaletxeak beren lana datorren udazkenean argitaratuko du. 

Lorerik Gorriena esku artean izateko gogo handiz geratu gara. Zorionak bioi!!