Boskotea ohean. Idazlea: Marie-France Painset. Ilustratzailea: Atelier Saje. Itzultzailea: Patxi Zubizarreta. Ibaizabal, 2019.

Haur txikiei zuzendutako liburua da. Kartonen argitaratua, lauki luzea da eta irekiz gero ohearen forma hartzen du. Beste berezitasun bat ere badu objektuak berak; hain zuzen, untxi formako paper-tirak ateratzen dira. Pastel-koloreek agintzen dute marrazki soiletan emandako istorioan. Eta zein da ba istorioa? Bost untxi daude ohean eta horietako bat ez dago konforme, estu daude eta hark ohe guztia berarentzat nahi du. Frantziako herri-kantu baten doinuarekin –"ils étaient cinq dans le nid"– bat egiten duen abestian emana da testua, non errepikapenak nagusitzen diren. Banaka untxiak ohetik eroriko dira –paper-tiren bitartez haurrak jausi daitezen lagunduko du–, bat, bi, hiru, lau... Eta azkenerako untxi bakarra geratuko da. Oi, baina, ohean bakarrik geratzea ez da, azkenerako, hain gustagarria. 

Zenbakiekin jolasteko aukera ematen du eta berekoikeriaren gaineko galdera airean uzten du. Ez du, hala ere, erantzunik ematen, ez eta bide zuzena zein den adierazten ere, galdera-marka hor uzten du.

Liburua Durangoko Azokako dendan lor daiteke, bestela liburutegian edo zuen ohiko liburu-dendan.

Liburu hau goxoki bat da, ez galdu!