Galtzagorri elkarteak sarritan parte hartu du Nazioarteko IBBYren (International Board on Books for Young People) Biltzarretan, aurkezpen, hitzaldi nahiz ikuskizunen bidez. Aurten, eta Etxepare Institutuaren laguntzari esker, lehen aldiz izan da Euskal IBBYa den Galtzagorri elkartearen ordezkaritza bat IBBYren Europako atalen bileran, Bolognako Azokan, apirilaren 1ean; baita apirilaren 3arekin egin den Europako IBBYen Biltzarrean ere.
Aipatutako barne bilera horretan parte hartu du Mireia Delgadok eta Saroa Bikandik osatutako Galtzagorri elkartearen ordezkaritzak. Bertan, IBBY Europaren Newsletterraren eta web eta sare sozialen inguruan hitz egiteaz gain, Europako IBBY bakoitzak bere burua eta egitasmoak aurkezteko aukera izan du; hala egin dute Euskal IBBYaren, hots, Galtzagorri elkartearen ordezkariek ere.
Bileraren baitan, IBBYren Europako atal ezberdinetako ordezkariez osatutako lan-mahaiak burutu dira, bakoitzaren egitasmoen informazioa elkartrukatzeko helburuz. Besteak beste, bileran jakin dugu, Palestinari buruzko liburu bilduma bat abiatu dutela IBBYren Europako atalek, eta hain zuzen, atal ezberdinei dei egin zaie, gaiaren inguruan lekuan lekuko hizkuntzan argitaratutako haur eta gazteentzako liburuak hautatu eta proposa ditzaten.
Garai zailetan, haurrek irakurtzeko duten eskubidea
Europan aldaketa politiko, sozial eta ekonomikoak bizitzen ari gara. Halakoetan sarri gertatu ohi den legez, haurrentzako liburuak ideia politikoak, sozialak, hezitzaileak eta moralak helarazteko bitarteko bihurtzen dira eta, IBBYren ustez, liburu horien eta haurren arteko heldu bitartekariak zentsuratik libre beharko lukete. Hain zuzen gai honi heldu dio aurten bi urtez behin Bolognako Azokan egiten den Europako IBBYen Eskualdeko Biltzarrak. Bertan parte hartu ahal izan dute baita ere Galtzagorriko ordezkariek. Hitzaldi eta aurkezpenen bitartez, Europako 12 herrialdetako editoreek, sortzaileek, irakurketaren sustatzaileek, ikertzaileek eta giza eskubideen aktibistek izan dituzten murrizketak
aztertu dituzte. Besteak beste, Eva Berghmans Belgikako Giza eskubideen aldeko adituak “Irakurtzeko eskubidea: irakurketaren sustapenerako duen eragin guztia ulertzea” hitzaldia eskaini du eta Kultura-askatasunaren eta Adierazpen-askatasunaren inguruko hainbat aurkezpen entzun ahal izan dira horren ostean.
Nazioarteko IBBYren prentsaurrea, urteroko hitzordua
IBBYren euskal adarra den heinean, Galtzagorrik urtero jasotzen du Nazioarteko IBBYk Bolognan egiten duen prentsaurrekora joateko gonbitea. 2025a izan da, honetan ere, mugarri. Bolognako Azokan izan diren Galtzagorriko bi ordezkariek lehengo aldiz joan ahal izan dutelako IBBYren ekimenen barruan "klasikoa" bihurtu den hitzordu honetara. IBBYk bere urteko egitasmo nagusiak azaldu ohi ditu prensa aurrean. Aurten, hauexek izan dira: Zailtasun bereziak dituzten haurrentzako liburuen 2025eko liburu bilduma, 2026an Ottawan (Kanada) egingo den IBBYren Nazioarteko Biltzarra, Bookbird IBBYren aldizkariaren inguruko berriak eta 2026ko Andersen Sarietarako hautagai guztien zerrenda (tartean, Elena Odriozola ilustratzailea eta Maite Carranza idazlea, Espainiako IBBY den OEPLIren hautagaiak).
Bidenabar, UNESCOK eta IBBYk abiatu berri duten egitasmo bat ere iragarri dute prentsaurrean: Desagertzeko arriskuan dauden hizkuntzetan eta hizkuntza indigenetan irakurle gazteentzako argitaratutako liburu nabarmenen IBBY-UNESCO Bilduma, hain zuzen. Haur Literaturaren esparruan hizkuntza aniztasuna babestu asmoz, azken hiru urteetan plazaratutako eta hizkuntza indigenetan edo desagertzeko zorian dauden hizkuntzetan argitaratutako liburuak hautatu eta proposatzeko deia egin diete IBBYk eta UNESCOK mundu guztiko haur literaturako sustatzaile zein argitaratzaileei. Ondoren, UNESCO zein IBBY erakundeetako kideek eta beste hainbat adituk osatutako batzorde batek egingo du aukeraketa.
