IBBYk gaur iragarri ditu aurtengo Andersen Sariak. Ilustratzaileen atalean Albertine suitzarrari eman diote 2020ko Andersen Saria eta idazleen atalean Jacqueline Woodson idazle estatubatuarrari. Junko Yokota aurtengo sarien epaimahaiburuak egin du iragarpena, eta aukeraketa zaila izan dela azpimarratu ondoren, Albertinen lanaren gaitasun lirikoa eta freskotasuna nabarmendu ditu, besteak beste. Woodson-en lanari dagokionez, detaileen zaintzari eta espontaneotasunari azpimarra egin die. Sariak Moskun, datorren irailean, egitekoa zen IBBYren 37. Biltzarrean emango bazituzten ere, COVID-19ak sortutako egoeragatik kongresua atzeratu eta 2021eko irailean izango dela esan dute, baita sariak orduan emango dituztela ere. 

Alabaina, euskal haur eta gazte literaturak pena hartu du gaurkoan, azken txanpara sartutako hautagaien artean Elena Odriozola ilustratzaile donostiarra zegoelako. Mundu zabaleko 36 ilustratzaileren artean galbahea pasa zuen Yokotak buru zuen nazioarteko adituek osatutako epaimahaiak eta Odriozola puntako seikoan sartu zen. Izan ere, 36 ilustratzaile haietatik hautaketa prozesuaren amaieraraino iritsi zen Odriozolaren lana. Albistea aurreko urtarrilean eman zuten eta ordutik ikuskizun egon gara. Aitzitik, seikoan egotearen gozoa ozpindu egin da gaur Odriozola ez baita irabazle suertatu.

Edonola ere, euskal haur eta gazte literaturaren komunitatearen bihotzean zuretzat da saria, Elena. Eskerrik asko zure lan zoragarriagatik.